Thaa shaishav mein komal kopal,o mere sukhe kislaya,

Hilta dulta rahta thaa,zeewan mein tere thi ek laya,

Sheetal,mand hawa aakar,tujhko thi jhoola jhulati,

Snehil kiranen tujh par padtin,aur tujhe sahla jaatin,

2-Rang birangi titaliyan aakar,apna pyar tujhe de jaatin

Hariyali se sajee dhajee,dali thi tujhko dulrati,

Kabhi kabhi koyal bhi aakar,lori tujhe suna jaati,

Masti mein uthata thaa jhoom,koyal jab laya mein thi gaati.

3-Patjhar ka ek jhoka aaya,bhu par aaj pada hai.

Spandan ka naam nahin hai,tu nispand pada hai

Sheetal hawa kabhi thi jhulati,aaj hai tujhko udati,

Wajood nahin ab raha hai tera,uski marji chalati.

4-Kabhi tu udata phir hai girta,kabhi bhatak jaata hai.

Hara bhara thaa kabhi ek din ,aaj tu sukha patta hai

Kitna yeh nissar hai zeewan,o mere sukhe kislaya.

Dukh ki saathi nahin yeh duniya,chahe kitne aayen pralaya.